almizan.ma
البيضاء في 2 مارس 2022 .
السياسة جعلوا لها قواعد وقوانين و لغة علمية وهي أيضا مادة قائمة تدرس في الجامعات كعلم من العلوم الإنسانية ضمن تخصص العلوم السياسية وفيها فروع عدة وهناك محللين سياسيين منهم المتخصص في السياسة الداخلية وغيرهم في الخارجية ومنهم من يختص في تحليل سياسة دولة معينة، او مجموعة دول او اقليم وهكذا.
ولها مصطلحات وحقل دلالي ومعجم سياسي قائم .
واذا سمعت التحليلات السياسية او قرأتها تكاد تصدق بل تعتقد ان هذه التحليلات هي قانون كوني مثله مثل القوانين الفزيائية الكونية.
لكن اذا ابتعدنا عن هذه الاكاديمية العليا للعلوم السياسية وحللنا الامر بالدارجة المغربية وعلى سبيل المثال حرب روسيا و اوكرانيا والتي في عمقها هي حرب روسيا و امريكا سيكون التحليل هكذا :
امريكا والدول الغربية اللي تابعينها ضسروا و طغاوا على العباد والبلاد واصبح كل شي كيتحرك بامرهم ونهيهم وهذا كله راجع للقوة الاقتصادية و العسكرية اللي عندهم لانهم ملكوا النووي الله يداوي.
ولات امريكا نظام عالمي وحيد خاصة مللي قضات على الاتحاد السوفياتي بمساعدة اتباعها وعلى راسهم الوهابية السعودية اللي فرخات ؤبيضات فكر متطرف ؤصدراتوا لافغانستان باش يحاربوا الاتحاد السوفياتي على اساس انه جهاد وان امريكا واتباعها هم اهل السنة والجماعة والاتحاد السوفياتي كفار.
طبعا الوهابية لانها بليدة وعقيدتها فاسدة ساهمت بزاااف في ترويج هذه الصورة في العالم .
المهم ان امريكا زادت طغات بعد القضاء على الاتحاد السفوياتي كقطب ثاني في النظام العالمي زعما ان العالم ولا عندو آمر وناهي واحد هو امريكا.
المهم روسيا حتى هيا ذكية فهمات اللعبة دخلات لجواها ؤُ بقات كتقوي في راسها خاصة في السلاح حتى اصبحت ثاني قوة عسكرية في العالم، و امتلكات السلاح النووي الله يداوي .
اصبحت روسيا كتهدد امريكا من جديد وتنافسها في التحكم في العالم ، فناضت امريكا ؤُ دارت ليها فخ مع اوكرانيا كدولة يحكمها رئيس كان ممثل و مهرج و راقص و سلوكه معروف ، المهم السيد كذبوا عليه ضحكوا عليه غدروا بيه، قالوا ليه نوض حارب حنا معاك مللي حارب رجعوا الوراء ؤخلاوه بوحدوا لانه اصلا لا يهمهم، هو مجرد فخ لغيره .
امريكا رجعات للوراء كتفرج وتندد ماشي خوفا ولا جبنا لا راها تاحراميات هادي يعني هذا الغدر باش يخليو روسيا تغطس رجليها في مستنقع الحرب وتطول الحرب وتطول معها خسارة روسيا ماديا وبشريا، لان هاد الحرب كتكلف روسيا الملايير يوميا كنفقة.
المهم شفتو دب التحليل بالدارجة المغربية كيف واضح ؤواقعي .
ؤُ مشات ديك المصطلحات ديال اللوجستيكية والاستراتيجية والبعد السياسي والنظام العالمي وداك الزواق الخاوي.
ؤحضرات في بلاصتها الغدر و تحراميات وبنادم طغى وهكذا، لان هادي هي الحقيقة زوقوها لينا بالسياسة و تاجروا بها في الجرائد والمجلات والاعلام حتى تيقناها.
لكن نفهموها احنا هكا باش نفيقو ونعيقو ونعرفو انها حرب من بلاد طغات ؤُ بغات كل شي يبقا تحت الرجلين تابع ليها ؤُ حال فمه مسطول.
لكن الدول العظمى بحال روسيا و كوريا الشمالية والصين والهند هادوا فايقين باللعبة ؤعارفين ان الزمر ضسر بزاااف ؤخاصو اللي وقفوا عند حدوا .
روسيا دخلات الحرب ؤُ عندها بلان في دماغها الى ربحات خلال 20 يوم غادي يسالي لفيلم ديال اوكرانيا لكن الى فات هاد المدة غادي تجبد السلاح الصحيح ؤعليا وعلى اعدائي لهذا هددات بالنووي ؤهي قادرة عليه ماشي ها هضرة خاويا.
و امريكا دب في ورطة كبيرة حصلات حصلة ديال الشمايت.
بدات كتهدد بالمقاطعة الاقتصادية زعما حاربوه في رزقو لانهم كيملكوا قواعد اللعبة المالية يعني الرزق بيديهم .
لكن السؤال هنا واش بوتين غادي يحني الراس ويطيع امريكا ولا غادي يبقا راجل ويستمر في تهديدوا ليهم بالنووي بحيث اما يرفعوا على روسيا جيمع العقوبات بل يعطيوها تعويض على هاد الحرب او يضرب الزمر كامل ؤكل شي يرتاح راحة ابدية.
المهم دب مبقاتش هاد الحرب لعبة سياسية راها ولات حرب حقيقية ديال بصح ، راها حرب الكبار ؤُ فيها ثلاث احتمالات:
1 : بوتين يحني راسو وينسحب من الحرب خاسر و يرضى بالذل والهزيمة والهلاك ويسالي الفيلم وهذا احتمال بعيد يوقع .
2 : امريكا تحني راسها وترفع جميع العقوبات على روسيا بل تعطيها تعويض على هاد الحرب ودير لراسها تخريجة يعني كذبة نتيقوها ؤنسكتو ؤُ سالا الفيلم.
3 : روسيا تضرب الزمر كامل بالنووي ؤكل شي يرتاح و ياكل في الجنة التفاح.
هاد الشي اللي كاين راه الناتو ضسرات ؤُ صبحات باغا تحكم الشمس والقمر اما العباد والبلاد راهم تحت الصباط.
روسيا والصين ومن معهم اتفقوا ان هاد المهزلة توقف و امريكا تدخل شويا جواها وتفوت عليها الصين ؤ روسيا ؤ تحكم الباقي لان الباقي اصلا خارج لحساب ها كمالت عدد .
هذا هو التحليل بالدارجة المغربية بعيدا عن شلاظة لغوية تحت مسمى العلوم السياسية .
